غالبيتنا منعرف انو Ted منصة لنشر التجارب الملهمة وقصص النجاح وهالقصص هي، والناس بتحلم تطلع تحكي بهالمنصة، بس لازم ننتبه على شغلة لحتى ما حدا يجدبا علينا وياخدنا بالعبطة.

فعاليات Ted الرسمية “يلي بدون x” هي الفعاليات المنظمة من قبل المنظمة الأساسية نفسها، ويلي بتكون فعلاً مشغولة بأعلى المعايير من كل النواحي، والشخصيات يلي بتحكي فيها بتكون فعلاً مؤثرة وصاحبة انجازات كبيرة بمجالاتها، وعم نحكي عن ناس بمستوى ستيف ووزنياك وبيل غيتس وعبدالله الموسى وهالوحوش هدول.

بينما Tedx هو أقرب إلى “فرانشايز” منه إلى المؤتمر الأصلي، وهو حرفياً “مؤتمر تم تنظيمه من قبل مستقلين”.

 يعني ممكن اليوم أنا وأخي عزت وأخي جمال نروح لعند المنظمة ونخبرن أنه بدنا نعمل Tedx لحارتنا ونحكي فيه عن ١ – ٢ -٣ – ٤، وناخد موافقة منهم ليسمحولنا نستعمل شعار المنظمة والبراند تبعها بالمؤتمر، وعدا عن ذلك كل شي بيتم تنظيمه أهلية بمحلية، وبغالب الأحيان بيكون كتييير بعيد عن مستوى البرنامج الاساسي من حيث التنظيم والتقنية ومستوى الناس يلي بتطلع بتحكي فيه.

إذا شخص متل Dan Lok ملك النصب والاحتيال طلع بخطاب Tedx عم يحكي عن قصة نجاحه!!

هاد الشخص مثلاً كل شي بيعمله بحياته هو أنه بيبيع الناس كورسات عن “كيف يصيرو أغنياء” بمبالغ كبيرة وأحياناً بتوصل آلاف الدولارات، ومحتوى الكورس كلياته من نوع “يو كان دو إت” وصف حكي بعشرة بزر، وبآخر الكورس بيطلب منك تشتري الكورس يلي بعده مشان تطور حالك أكتر بالبول شيت يلي بيحكيه، وهيك..

طبعاً أكيد مو كل الناس يلي بتطلع بTedx بيكونو خرطي، بس الأكيد أنه مو بمجرد ما الشخص يكون طلع خطب على منصة “tedx حارة الضبع” معناها صار عنده مصداقية وصار ملك النجاح، وأهم شي لا تأجر عقلك لحدا.

اترك تعليقًا

لن يتم نشر عنوان بريدك الإلكتروني. الحقول الإلزامية مشار إليها بـ *