من شروط نجاح أي مشروع جديد هو وجود “رؤية” تكون واضحة وتجيب على سؤال “لماذا” عملت هذا المشروع.
لتعرف اذا عندك الرؤية فعلًا، اكتب بيان صحفي عن مشروعك (حتى لو ماكان جاهز) على أساس انك رح تبعته للصحافة بكرا الصبح، لتشوف اذا فعلًا انت نفسك عندك فكرة شو عم تعمل أو لا.
وشوف اذا رح يطلع البيان مقنع ومحرز كفاية ليكون “news worthy” ولا بس مجرد شي تنبسط فيه بحالك انك “عملت شي”، وجرب ارسل هالبيان لأصدقاء، أو اطلب التقييم من ناس صحفيين.
اذا ما كان الموضوع فعلًا “news worthy” لا تضيع وقتك فيه.
تقول الفنانة الكبيرة نجوى كرم “خليك عالأرض – لا تعلا كتير – مافي طاير علّا وإلا – وقع بكير”
مشكلة الشركات يلي عملت سبايك كبير بعد كورونا وتوسعت على أساسه (على راسها Getir) أنها فكرت أنه خلص هاد السبايك رح يضل طالع للأبد، واشتغل حرق الكاش بالهبل على عروض وشغلات كانت فعلاً مدهشة (يا ترى قديش ربحوا منها زباين دائمين بعد ما خلصت؟).
ومع أنه في كمية ناس كتيرة تعلمت على التسوق أونلاين بشكل عام، وطلب حاجيات البيت والخضار بشكل خاص وصعود شغلة الـqCommerce – بس في نسبة كبيرة من المستخدمين توقفوا عن استخدامها، أو بحد أدنى خففوا استخدامها بعد نهاية أزمة كورونا (لأنها ماعادت حاجة).
التضخم وصل مستويات مخيفة عالمياً، والعالم دخل رسمياً في حالة كساد اقتصادي، وهالنوع من الخدمات عندها مصاريف كبيرة وهالشي عم ينعكس بالنهاية على أسعار المنتجات، وعم يصير في فرق منيح بين سعر السوبر ماركت والطلب من التطبيقات + أنها لسا بتطلب رسوم توصيل للطلبات دون حد معين.
وازداد الوضع بهدلة بعد ما بلشت الأزمة الاقتصادية الجديدة تظهر بشكل أوضح وأكبر (يلي جزء منها ناتج عن تبعات كورونا، وزاد في الطنبور نغماً الهجوم الروسي على أوكرانيا)
مشان هيك، الناس يلي فيهم يوصلوا السوبر ماركت عم يفضلوا يتسوقوا لحالهم، ويلي الموضوع بالنسبة اله حاجة فممكن يستمر بالطلب، وبكل تأكيد هالخدمات رح تضل موجودة وما راح تختفي، بس بدها تنزل من عالقمر وترجع عالكرة الأرضية وتنمو بشكل طبيعي.
الله يعين العالم يلي بلشت تخسر أشغالها بهالوقت الصعب، ويطفينا بنوره احسن شي
أتممت هذا الكورس اليوم، وأوصي به بشدة للعاملين في أي مجال يتضمن “صناعة محتوى”، وهذه “بعض” الملاحظات والأشياء التي تعلمتها اليوم بدون تعديل ولا ترتيب:
مو ضروري يكون صاير معك أحداث وأكشن ودراما بحياتك لحتى تكوّن قصة، ممكن تكون انسان طبيعي عادي.
شطارة الكاتب بتكون بأنه يعمل من الاحداث العادية قصص ذات قيمة للقارئ.
في فرق بين السردية Narrative وبين القصة Story.
أول فكرة بتطلع معنا رح تكون Cliché وتوجد طرق لتجنب الوقوع في ذلك، وتحسين الأفكار باستمرار.
سرد الأحداث يلي بتصير معك بدون سياق وبدون فكرة هو “تشظي” لا رواية قصة.
صفصفة وتشكيل الكلمات التقيلة للتظاهر بالعمق هي علاك مصدي.
يوجد أطر عمل Framework ممتازة لعرض القصص بطريقة سلسة ومنظمة ومفيدة.
الكتابة للانترنت مختلفة عن باقي الكتابة، لأن الشخص لما يقرا كتاب بيكون مركز ١٠٠٪ فيه، بينما على الانترنت يادوب ١٠٪، وبالتالي لما تكتب للانترنت لازم تكتب كأنك عم تكتب لولد صغير “من حيث البساطة”.
لتقدر تستفيد من رواية القصة لعمل محتوى يخدم بزنس، لازم تجمع بين قصة شخصية من جهة، وما يطلبه الجمهور من جهة، ونقاط البيع من جهة أخرى.
ممكن تطبيق هالأساليب على المقالات، التدوينات، محتوى السوشل ميديا، وأي شي فيه تفاعل مع الناس (كطرف متلقي)
فيديو جديد قمت بانتاجه لصالح GreenOcean Media عن تسويق المتاجر الالكترونية وتحسين نسب التحويل، اعتمدت فيه على أرقام واحصائيات، ومعلومات وخبرة اكتسبتها من عملي مع العديد من المتاجر الالكترونية خلال السنوات الأخيرة.
كما فعل رفيقي المناضل ويليام غيتس، والزميل باراك أوباما أبو حسين، ولكي أضرب كل العصافير بحجر واحد (الأذى بدمي) أقدم لكم قائمة شاملة كاملة بكل ما تابعته من أفلام ومسلسلات، وما قرأته من كتب خلال عام 2021.
الأفلام التي تابعها عبدالله الموسى في 2021
Steve Jobs 2015
منذ صدور هذا الفيلم لأول مرة عام 2015 وحتى قبل فترة كنت أحضره مرة واحدة على الأقل أسبوعياً، وكنت في كل مرة ألاحظ فيه زاوية جديدة لم ألاحظها في المرة السابقة. ولكن مؤخراً، انخفضت هذه المرات إلى مرة واحدة على الأقل شهرياً، غالباً لأني خريتها!
أجمل مقطع في الفيلم هو المواجهة بين جون سكولي وستيف جوبز
The Social Network 2010
عن الحرامي مارك زاكربيرج وكيف أسس شركته بالنصب والهيلمة متل بكري القشطة والصعوبات التي واجهته منذ أن طور موقع لتقييم البنات إلى أن سرق فكرة فيسبوك من الوينكلفوس.
أتوقع ممكن ينعمل منه جزء تاني عن كيف سرق الستوري من سناب شات والريلز من تيك توك، ويمر به أيضاً استحواذه على انستقرام وواتساب.
ألوان الفيلم مريحة والفيلم هادي النبرة (مو هادي الأحمد) بشكل عام
موسيقى الفيلم كاملة تساعدني على التركيز في أوقات العمل
الفيلمين السابقين أتابعهم بكثرة لما أمر في فترة ضغط أو سلبية، وبشكل ما يساعدوني على الخروج من الحالة، وفي بعض الأجزاء بيعرضوا مشاكل بتعرض لها شخصياً خاصة في حياتي العملية وشغلي، فلذلك تعبر عني وكذا.
GORA
جيم يلماز، من عباقرة الدراما في تركيا، وهذا فيلم خيال علمي كوميدي عن “عارف” اللي بيخطفوه المخلوقات الفضائية وبيكافح ليخلص حاله بالكثير من الطرق العبقرية.
AROG
الجزء التاني من الفيلم السابق، وفي حركة سحرية أكيد ما انتبهت عليها، أنه اذا بتقرا اسم الفيلم من اليمين لليسار بيطلع نفس اسم الجزء السابق اذا بتقراه من اليسار لليمين (سوبهانا الله)
بعد عودة “عارف” إلى الكرة الأرضية (تم الحرق) يلحقه الكاهن الفضائي الشرير لكي ينتقم منه ويرجعه بآلة الزمن إلى عصر الجمع والالتقاط، وكالعادة يكافح عارف آبيه للعودة بالكثير من الطرق العبقرية.
Bu Burnham Inside
كنت مفكر حالي رايح أحضر شي مسلي، طلع أكتر شي مقت ونكدي ومزعج حتى مزقلي أحشائي وما كملته.
فيه أفكار كتير تقيلة من الأوفر ثينكنق يلي طلع مع “بو” هو ومحجور بالبيت ومافي يطلع يعمل ستاندب كوميدي برا المسكين.
طبعاً أنا حضرته بعد ما وصلتني غنية CEO ENTREPRENEUR BORN IN 1964 JEFFRY BEZOS شي زليار مرة، وصارت ترند على تيك توك وفي كل مكان.
The Intern
فيلم لطيف وظريف ومنعش عن شركة أزياء بتوظف واحد ختيار، والزبدة أنه العمر مجرد وبلا بلا بلا بلا..
بس لا، ما رح يحب صاحبة الشركة ويتم النصيب.
المسلسلات التي تابعها عبدالله الموسى في 2021
How to sell drugs online (Fast)
ومحدد له الفاست بين قوسين كمان 🙂
مسلسل ألماني مجومس، ندمت لأني بلشت فيه لأنه ما قدرت ما كمله، وبنفس الوقت كان مزعج نوعاً ما بتصوير الحياة بكثير من النيهيليزمية.
شب ألماني درويش على باب الله، بده يبيع حبوب مسكن أونلاين، والمشاكل التي تواجهه والكثير من الأكشن.
يلي جذبني له هو العنوان يلي أوحالي بالديب ويب، يلي طلع فعلاً جزء منيح من المسلسل.
The billion dollar code
مسلسل ألماني يحكي عن الفكرة التي طورها شابان ألمانيان، لتتم سرقتها لاحقاً من شركة قوقل لتصبح Google Earth، وأحداث المسلسل تدور عن السرقة والمحاكمة والخ الخ الخ.
يستحق المشاهدة بقوة، خاصة لو كنت مهتم تعرف عن الجانب الخرة في عالم المشاريع وريادة الأعمال خاصة التكنولوجية.
Call my Agent
هي ثاني مرة بحضره (أول مرة كانت 2020) مسلسل فرنسي من إنتاج نتفليكس، عن وكالة إدارة أعمال ممثلين، والمشاكل يلي بتصير فيها، وجَو الممثلين بشكل عام.
طبعاً المسلسل فيه كل شي نتفليكسي بالعالم، لأنه أهم شي التنوع، من الديني للعرقي للوني للتعريصي، وحتى لو ما في سياق دراما، ممكن تتدبر مو مشكلة.
للأمانة المسلسل ظريف ولطيف، واستفدت منه كمان شوية أشياء من هنا وهناك.
Comidark Films
كل حلقة في هذا المسلسل عبارة عن فيلم مستقل فيه كوميديا سوداء. من إبداعات جيم يلماز أيضاً.
الكتب التي قرأها عبدالله الموسى في 2021
Beyond Order 12 More Rules for Life – Jordan B Peterson
الجزء الثاني من كتاب جوردان بيترسون الشهير، ويتضمن تتمة لقواعد الحياة من وجهة نظره.
حسيت الكلام بهالإصدار أخف نوعاً ما من سابقه، بس كعادة بيترسون، شي بيعبي الراس.
Inspiring Innovation – 75 Marketing Tales to help you find the next big thing – Giles Lury
ما بعرف ايمت الكتاب صارو يحطو الكتاب كامل في اسم الكتاب، بس أتوقع واضح من عنوان الكتاب شو محتواه، وواضح كمان إني بستفيد منه في شغلي بالتسويق.
مو من الكتب يلي بتقراها، بل يلي ممكن تتصفحها كل فترة، وتاخد منها أفكار لما تقفل معك القريحة.
The Four – Scott Galloway
أنا وأبو الغال في إحدى اللقاءات
أستاذي الكبير والخطير “سكوت غالواي” بروفيسور التسويق في جامعة نيويورك، وزلمة مخضرم في ريادة الأعمال، وعامل كذا عملية تخارج، وكذا فشلة، شي كتير على عيني.
يتحدث في هذا الكتاب عن الشركات الأربعة الكبار; أمازون – قوقل – فيسبوك – آبل، وليش في مرحلة ما لازم يتم تفكيك هالشركات لأنه خروها.
أي شخص مهتم فعلاً أنه يصير وحش بالتسويق، لااازم يحضر كل فيديوهات سكوت على يوتيوب ويقرا كل كتبه، وإذا قدر يسجل بأحد كورساته فما يقصر، ونعم أنا من الأبطال الذين فعلوا كل هذه الأشياء، ولهذا السبب أنا من أفضل استشاريي التسويق في الشرق الأوسط.
Business Strategy – A guide to effective decision-making – Jeremy Kourdi
أيضاً المكتوب باين من عنوانه، كتاب يشرح كيفية عمل استراتيجية بزنس بأفضل طرق، ولتقليل الكوارث، يا ريتني قريته قبل سنتين بس!
The School of life – An emotional education – Alain De Botton
في قناة على يوتيوب اسمها School of life بتنتج فيديوهات ظريفة، وعندن معلق صوتي ابن حمولة، فمؤسس القناة هو نفسه كاتب هالكتاب.
ما خلصت الكتاب، ولكن الجزء اللي خلصته حتى الآن أخدت منه انطباع انه الكتاب مفزلك، وتنمية بشرية بس لابسة كرافة.
يمكن أن تصرف كثيرًا من الوقت والجهد على تطوير منتج أو مشروع ما ما لشريحة من العملاء، ويرفضوه بكل بساطة. خاصة في المراحل الأولية التي تكثر فيها المشاكل، وفي جو مليء بالمنافسة والحيتان من كل المجالات.
لا أحد يهتم بك ولا بمنتجك من الأساس!
هل يمكنك أن تشتري معطفًا لا يحميك من البرد فقط لأن صاحبه حاكه يدويًا ووضع فيه وقتاً وجهداً؟!
فإذا كان عملك لايقدم لعملائك قيمة حقيقية -من منظورهم هم- فعملك كله بلا قيمة!غير طريقة تفكيرك، منتجك هو القيمة التي تقدمها.
أما تقدير وقتك وجهدك، فهو أمر تفعله مع نفسك، ولا يجب أن يهمك تقدير الآخرين له، مع العلم أن هذا التقدير سيأتي في النهاية (عندما تقدم منتجاً نهائياً يلبي رغبات الجمهور، أو يحقق الهدف المرجو منه).
استمتع برحلة التعلم، وتعامل مع كل المَطَبات والأزَمات، وتَعلّم منها وطَوّر نفسك ما استطعت، ففي عالم الأعمال لا مكان للكُسالى، وقد تكون هذه الرحلة أهم من منتجك النهائي كله.
كل فكرتي عن المقاهي من قبل انها أماكن لشرب القهوة بعد ما تخلص شغل أو لما بدك تتسلى مع رفقاتك. مؤخراً بس حتى عرفت عن كونسبت الشغل من المقاهي، وأنه موجود منيح باسطنبول.
بهالصفحة رح أحط تقييمي لأفضل المقاهي المناسبة للعمل في اسطنبول بحسب تجربتي معها، وأحاول أحط تقييمي لها بحسب النقاط المهمة لأي شخص بده يشتغل.
Kronotrop – Kanyon AVM
الهدوء: 10/10 الجو مناسب جداً للشغل، وصوت الموسيقى مو عالي وبيعمل جو حلو، وحتى الموسيقى نفسها بتعمل أجواء ظريفة غير مزعجة.
واي فاي: 10/9 سرعة النت جيدة جداً، بس لازم تسجل معلوماتك ورقم هاتفك لحتى يتصل الجهاز.
جو مناسب للشغل: 10/10 القعدة كتير حلوة وفي كراسي وصوفات مريحين بالقعدة، وفي طاولات مخصصة للشغل وعليها فيش كهربا بمعدل فيشتين لكل متر ونص.
في تحسن في مستوى الغرافيكس وواقعية اللعبة والجمهور .. لكن هل هذا يبرر كل هالتضخم؟! وفي أطوار جديدة للعب على عيني وراسي، ولكن كم حد فعلا بيستخدمها؟ جداً قليل!
جهاز PS5 بيجي مع 1 تيرا بايت (تقريباً) بس مع أحجام الألعاب الحالية ما بيكفيك تنزل عليه 5 ألعاب.. عدا عن أن تحول بيع الألعاب في غالبه إلى الديجيتال والتحميل يلي ممكن ياخد أيام في بعض الأحيان! حتى الناس يلي توفر عندها 5G بأقصى سرعة مازالت بتحتاج وقت (مو قليل) لتحميل الألعاب
أيضاً نسبة كبيرة من الألعاب صارت Pay-to-win وما فيك تربح بدون ما تدفع حتى لو كنت شاطر وختمت اللعبة. والأغلبية الكاسحة من الألعاب اليوم بتنلعب أون لاين وباتل رويال.. طب يا أخي أنا بدي لعبة خفيفة نضيفة أتسلى فيها لوحدي لما أحتاج أهرب من الناس، وأفصل النت وأقعد أفش خلقي؟ وين أروح؟
نظرة إلى عالم الألعاب اليوم، من مستخدم عادي Casual Gamer
لعبة NBA 2014 – حجمها 7GB لعبة NBA 2021 – حجمها 120GB في تحسن في مستوى الغرافيكس وواقعية اللعبة والجمهور .. لكن هل هذا يبرر كل هالتضخم؟!
وفي أطوار جديدة للعب على عيني وراسي، ولكن كم حد فعلا بيستخدمها؟ جداً قليل!
